جيلاني، سيد ڪرم الله شاهه: گهوٽڪيءَ جي جيلاني ساداتن مان سيد ڪرم الله ولد فيض الله شاهه جيلاني پنهنجي وقت جو وڏو عالم ۽ مدرس ٿي گذريو آهي. پنهنجي والد فيض الله شاهه کان پوءِ سندس جانشين ٿيو، وڏو پرهيزگار، زاهد ۽ قرآن شريف جو حافظ هو. هن والد جي وفات کان پوءِ جيلاني مدرسي ۾ درس تدريس ۽ پيري مريديءَ جو سلسلو جاري رکيو. هن بزرگ 11 رمضان 1260هه مطابق 1844ع تي وفات ڪئي. سندس مقبرو گهوٽڪيءَ جي وڏي خانقاهن ۾ شمار ٿئي ٿو.